Lionel Messi yanditse amateka mashya muri FC Barcelona (Amafoto)

Umunya-Argentine Lionel Messi, yaraye yanditse amateka akomeye yo kuba umukinnyi wa mbere ku Isi watsinze ibitego byinshi akinira ikipe imwe, nyuma yo guca agahigo kari gafitwe n’igihangange Pele.

Messi yabigezeho nyuma yo gufasha FC Barcelona akinira gutsinda Real Valladolid ibitego 3-0, mu mukino wa shampiyona ya Espagne wabaye mu ijoro ryakeye.

Messi yatsinze igitego cya gatatu muri uriya mukino, ahita yuzuza ibitego 644 amaze gutsindira FC Barcelona mu marushanwa yose.

Mu mpera z’icyumweru gishize uyu mugabo w’imyaka 33 y’amavuko yari yatsinze igitego cya 643, mu mukino ikipe ye yari yanganyijemo na Valencia ibitego 2-2.

Icyo gihe yahise anganya ibitego 643 Pele yatsinze akina muri Santos y’iwabo mu gihugu cya Brésil hagati y’umwaka wa 1956-1974; mbese mu gihe cy’imyaka 18.

Messi we yaciye kariya gahigo mu gihe ari mu mwaka we wa 17 muri FC Barcelona yatangiye gukinira muri 2004.

Uretse kuba Lionel Messi yandikiye amateka muri uriya mukino, yanashoboye gutanga umupira wa mbere uvamo igitego nyuma yo kuwuterekera myugariro Clement Lenglet ku mutwe, akawushyira mu izamu ku munota wa 21 w’umukino.

FC Barcelona yatsinze igitego cya kabiri ibifashijwemo na Martin Braithwaite, ku mupira uyu munya-Denmark yari ahawe n’Umunyamerika, Serginho Dest.

Gutsinda Valladolid byatumye FC Barcelona igumana umwanya wa gatanu muri shampiyona ya Espagne n’amanota 24, mu mikino 14 imaze gukina.

Irarushwa amanota abiri na Villarreal iri ku mwanya wa kane n’amanota 26, mu gihe Atletico Madrid ari yo ikomeje kuyobora iyi shampiyona n’amanota 32.