Abakekwaho gushaka kwica Gen Katumba bagejejwe mu rukiko baragizwe intere (Amafoto)

Abantu batanu bakekwaho kugerageza kwica Minisitiri wa Uganda w’Umurimo n’Ubwikorezi, Gen Katumba Edouard Wamala, bagaragarije urukiko ibisebe bavuga ko byaturutse ku iyicarubozo bakorewe na Polisi ya Uganda ubwo bari bafunzwe.

Aba batanu ubwo bagezwaga imbere y’urukiko rwa Nakawa kuri uyu wa Kane, bose bagaragaye basuka amarira bavuga ko bakorewe iyicarubozo rikomeye.

Beretse itangazamakuru imihirihiri y’inkoni bakubiswe mu mugongo, ku maguru, ku birenge, ku maboko no ku bibuno.

Abakekwaho kugerageza kwica Gen Katumba, barimo Muhammad Kagugube, Siriman Kisambira, Abudallah-Aziz Ramadhan Dunku, Kamada Walusimbi na Habib Ramadhan Marjan.

Uko ari batanu bakurikiranweho ibyaha birimo birimo iterabwoba, ubwicanyi no kugerageza ubwicanyi; bakaba bafungiye kuri gereza ya Kitalya.

Muri rusange abakekwaho kugira uruhare mu iraswa rya Gen Katumba ni barindwi kuko hari abandi babiri bafashwe mu cyumweru gishize, mu gihe abandi batanu barashwe na Polisi ya Uganda.

Bariya batanu ubwo bagezwaga imbere y’ubutabera umwunganizi wabo mu mategeko, Geoffrey Turyamusiima yabasabiye kuba barekuwe kugira ngo bajye kwivuza, gusa umucamanza avuga ko nta bubasha bwo kubarekura afite butari ugutegeka ko bakomeza gufungwa, ahubwo ubuyobozi bwa gereza akaba ari bwo bubafasha kuvurwa.

Mu gitondo cy’itariki ya 01 Kamena ni bwo abagizi ba nabi bagabye igitero ku modoka yari itwaye Gen Katumba Wamala mu gace ka Kisasi i Kampala, bica umukobwa we Brenda na Sgt Haruna Kayondo wari umushoferi we.

Uyu mujenerali w’inyenyeri enye yarashwe amasasu menshi ku maboko, gusa ku bw’amahirwe Imana imuha amahirwe ya kabiri nk’uko yabitangaje mu muhango wo gushyingura umukobwa we.

Kurikura Ibiganiro n’amavidewo ya BWIZA kuri YouTube