Haruna Niyonzima yasezeweho na Yanga Africans mu cyubahiro (Amafoto)

Kapiteni w’ikipe y’igihugu ‘Amavubi’, Haruna Niyonzima, yakinnye umukino wa nyuma mu kipe ya Young Africans yo mu gihugu cya Tanzania, asezerwaho mu cyubahiro n’iyi kipe.

Hari mu mukino wa Shampiyona ya Tanzania iyi kipe ikunzwe kurusha izindi muri Tanzania yatsinzemo Ihefu ibitego 2-0.

Ni ibitego byombi byinjiye mu gice cya mbere cy’umukino bitsinzwe na Feisal Salum Abdalla.

Haruna yinjiye mu kibuga mu gice cya kabiri cy’umukino asimbuye Zawadi Mauya.

Mbere y’umukino abakinnyi bose ba Yanga Africans n’abagize staff technique y’iyi kipe bifotozanyije na Haruna bambaye imipira iriho ubutumwa bumushimira.

Nyuma y’umukino ni bwo habaye umuhango nyirizina wo gusezera ku mugaragaro kuri uyu Kapiteni w’Amavubi.

Haruna Niyonzima yageze muri Yanga Africans muri 2011 avuye muri APR FC ya hano mu Rwanda.

Mu myaka umunani yakiniye iyi kipe, yatwaranye na yo ibikombe 5 bya shampiyona ya Tanzania, bibiri by’igihugu, Community Shield Cup inshuro eshatu na CECAFA Kagame Cup imwe.

Nyuma yo gutandukana na Yanga Africans muri 2018 Haruna yerekeje muri Simba Sports, atwarana na yo ibikombe birimo bibiri bya Shampiyona ya Tanzania mbere yo kwerekeza muri AS Kigali, ari na yo yavuyemo asubira muri Yanga mu mwaka ushize wa 2020.

Kurikira ibiganiro n’amavidewo binyura kuri Bwiza TV