U Rwanda rugiye kohereza muri UNMISS icyiciro cya 4 cy’abapolisi biganjemo abagore

U Rwanda rugiye kohereza muri Sudani y’Epfo itsinda ry’abapolisi 160 biganjemo ab’igitsina gore, mu butumwa bwa Loni bwo kubungabunga amahoro muri kiriya gihugu UNMISS.

Iri tsinda rya kane riyobowe na SSP Marie Grace Uwimana, rizasimbura irindi tsinda ryari rimaze umwaka mu butumwa muri Sudani y’Epfo.

Mbere y’uko aba bapolisi bahaguruka mu Rwanda, babanje guhabwa impanuro n’Umuyobozi wa Polisi wungirije ushinzwe ibikorwa, DIGP/Ops Felix Namuhoranye wabasabye kuzasohoza inshingano zabo kinyamwuga, kurangwa n’ikinyabupfura ndetse n’ubunyangamugayo.

Ati: “Muzaba mushinzwe kugarura amahoro kandi muzaba muhagarariye igihugu, buri kimwe muzakora kizabe kigaragaza indangagaciro n’isura nziza y’igihugu cyanyu.”

Yakomeje agira ati: “Gukorera hamwe ndetse no gufatanya mwubaha abandi bose muzaba mukorana bikwiye kubaranga mu mirimo muzaba mushinzwe. Mwateguwe neza ndetse muhabwa amahugurwa azabafasha gukora neza, mugaragaza ubunyamwuga ndetse no kubaha umuco w’abaturage muzaba mushyinzwe kurinda.”