Colonel Serge Mavinga waherukaga gutabwa muri yombi na FARDC azira M23 yapfuye

Colonel Serge Mavinga wahoze ayoboye batayo y’Ingabo za FARDC izwi nka ‘Jungle’ mbere yo gutabwa muri yombi, yapfuye kuri uyu wa Mbere tariki ya 23 Mutarama 2023.

Mu Ukwakira umwaka ushize ni bwo Colonel Mabenga yatawe muri yombi na FARDC ashinjwa ubugambanyi.

Mbere yo gutabwa muri yombi yari ayoboye ingabo zidasanzwe zatorejwe muri Gabon kurwana urugamba rwo mu mashyamba zari zaroherejwe guhangana na M23 mu gace ka Ntamugenga.

Aka gace Ingabo za Congo Kinshasa zakirikanwemo na M23 ku Cyumweru tariki ya 23 Ukwakira 2022.

Ntamugenga ikimara gufatwa

Ubwo Ntamugenga yafatwaga, Colonel Mavinga ni we wabwiye ibinyamakuru mpuzamahanga birimo AFP ko yafashwe, yitwaje ko bahavuye banga ko hagwa abasivili benshi kuko ari ahantu hatuwe cyane.

Andi makuru yavugaga ko uyu Colonel azira kuba yari yaratangaje ko ingabo zatsinzwe hakiri kare.

Amakuru avuga ko uyu musirikare yaguye i Kinshasa muri Repubulika Iharanira Demokarasi ya Congo aguye muri gereza ya Ndolo.

Bivugwa kandi ko uyu musirikare akimara gupfa umuryango we wangiwe kureba umurambo we.