RDC: Jean-Pirre Lacroix wa Loni yashishikarije MONUSCO gufatanya na FARDC na SAMDRC

Umunyamabanga Mukuru Wungirije w’Umuryango w’Abibumbye ushinzwe ibikorwa byo kubungabunga amahoro Jean-Pierre Lacroix, ukomeje uruzinduko muri Repubulika ya Demokarasi ya Congo ku wa Gatatu, itariki ya 18 Nzeri, yasuye ingabo zinyuranye z’Umuryango w’Abibumbye zifite icyicaro ahitwa Mubambiro, hafi ya Saké, ku birometero 27 mu burengerazuba bw’Umujyi wa Goma, muri Kivu y’Amajyaruguru.

Jean-Pierre Lacroix yahumurije abo bashinzwe kubungabunga amahoro anabashishikariza, mu nshingano zabo zo kurinda abasivili, gufatanya cyane n’Ingabo za Congo ndetse n’Ingabo za SADC zoherejwe mu butumwa bwiswe SAMIDRC.

Yaganiriye kandi nabo ku myiteguro yabo n’imbogamizi bafite nk’uko iyi nkuru dukesha Radio Okapi ikomeza ivuga.

Aha, yasuye kandi ibigo bitandukanye by’ingabo ndetse n’icyumba cyo kubaga kiyobowe n’ingabo za Malawi.

Iki cyumba cyubatswe mu mezi abiri ashize, cyita ku bakomeretse mu ntambara, cyane cyane abasivili n’abasirikare ba FARDC.

Muri icyo kigo niho abakomeretse babanza guhabwa ubutabazi bw’ibanze mbere yo kwimurwa i Goma.

Lacroix yagaragaje icyizere abasirikare ba Loni baha abasivili muri kariya gace bavuga ko kabangamiwe n’inyeshyamba za M23.

Yashimiye ingabo za MONUSCO ku bikorwa byazo, nubwo ibintu bitoroshye.

Ati: “Dufite ubutumwa bugamije kurengera abaturage. Muri ako karere hari urujya n’uruza rw’abantu bavanwa mu byabo. Nizera ko tugomba gukora ibishoboka byose kugirango tubigereho nubwo bitoroshye. Abaturage bafite abafatanyabikorwa, barimo MONUSCO, bakora ibishoboka byose kugira ngo bagabanye imibabaro yabo, babarinde, ariko kandi bazane amahoro. ”

Ku wa Gatatu nyine, nyuma yo kubonana na Guverineri w’intara w’umusirikare, Jean-Pierre Lacroix yanabonanye n’abayobozi ba SAMIDRC i Goma bagirana ibiganiro.