Abacamanza mu rubanza rwa P Diddy, beretswe amashusho y’urukozasoni bipfuka mu maso

Mu rubanza rwa Sean ‘Diddy’ Combs, umuraperi wamenyekanye cyane ku isi, abacamanza bashyikirijwe amashusho yiswe “Freak Offs” agaragaza ibikorwa bivugwaho gucuruza abagore n’imibonano mpuzabitsina iteye inkeke.

Nk’uko bitangazwa na Mail Online, aya mashusho agaragaza Diddy ari kumwe n’abandi bantu barimo n’uwahoze ari umukunzi we Cassie Ventura. Amashusho yafashwe mu Ukwakira 2012 mu cyumba cya Trump International Hotel i New York, agaragaza Ventura ari kumwe n’abagabo babiri bamenyekanye ku mazina ya ‘The Punisher’ na Dave.

Amashusho yerekanwe ku buryo bwihariye ku bacamanza gusa bakoresheje amaheadphones, kandi bumvaga amajwi y’indirimbo n’imiborogo y’abagore.

Kubera amabi agaragara muri ayo mashusho, abacamanza bamwe bagaragaje ko badashoboye kwihanganira ibyo barebaga, bamwe bipfuka mu maso.

Umucamanza Arun Subramanian yafashe icyemezo ko ayo mashusho agomba kuguma mu ibanga, nyuma y’uko impande zombi yaba abunganira Diddy n’uruhande rwa Cassie basabye ko ayo mashusho atajya ku mugaragaro.

Urubanza rurakomeje, rukurikiranywe n’abantu benshi ku isi kubera uburemere bw’ibirego bijyanye n’ubucuruzi bw’abantu, ihohoterwa rishingiye ku gitsina n’iyicarubozo bikekwa kuri Diddy.