Abakongomani bigaragambije basaba ko Congo yashyirirwaho Urukiko Mpanabyaha

Ibihumbi by’Abakongomani kuri uyu wa Kane, babyukiye mu myigaragambyo basaba iyubahirizwa ry’imyanzuro ikubiye muri raporo yiswe “Mapping Report” ivuga ku byaha bitandukanye ndengakamere byakorewe ku butaka bwa Congo Kinshasa.

Ni imyigaragambyo yabereye mu mujyi wa Bukavu ho mu ntara ya Kivu y’Amajyepfo.

Abigaragambya bahagurukiye ku igorofa ryitiriwe umuvugabutumwa ‘Munzihirwa’ wishwe n’inyeshyamba za AFDL, bafite ibyapa biriho ubutumwa butandukanye.

Bumwe mu butumwa bugira buti: “Twebwe abagizweho ingaruka n’ubwicanyi muri Congo, twamaganye ibikangisho by’urupfu bishyirwa kuri Dr. Denis Mukwege, hanyuma tugaha ikaze urukiko mpanabyaha rushyirirwaho Congo.”

Uyu Dr Mukwege ari mu mpuguke zakoze iriya Raporo, abihererwa igihembo cy’amahoro kitiriwe Nobel muri 2018. Mu minsi ishize byavuzwe ko hari abamwoherereje ubutumwa bamubwira ko bazamwica.

Abaturage basabaga ko nyuma y’imyaka 10 yo guceceka, abategetsi ba Congo Kinshasa bakwiye kubahiriza imyanzuronama ikubiye muri Mapping Report.

Mu basabye ko Repubulika Iharanira Demokarasi ya Congo ishyirwaho urukiko mpuzamahanga mpanabyaha, harimo na Martin Fayulu, umwe mu bayobozi b’ihuriro ry’amashyaka ryiswe ‘Lamuka’ wari uhatanye mu matora y’umukuru w’Igihugu na Perezida Félix Antoine Tshisekedi.

Fayulu yagize ati: “Imyaka 10 nyuma y’ishyirwa ahagaragara rya Mapping Report muri RDC, amaraso y’Abanye-Congo araririra ubutabera n’indishyi. Banye-Congo n’Abanye-Congokazi, mureke twese dukangurire imbaga ishyirwaho ry’urukiko mpuzamahanga mpanabyaha rwa Congo.”

Abigaragambya banaririmbaga indirimbo zirimo ubutumwa bugira buti: “Nta butabera, nta mahoro, dushyigikiye Mapping Report.”

Kuri uyu wa Kane tariki ya 01 Ukwakira 2020, ni bwo Mapping Report yujuje imyaka 10 imuritswe.

Iyi Raporo yakozwe na Komisiyo y’Umuryango w’abibumbye ishinzwe kurengera uburenganzira bwa muntu, ikaba isobanura ibikorwa bihonyoza uburenganzira bwa muntu byabereye muri Congo Kinshasa hagati y’1993 na 2003.

Mapping Report yakozwe n’itsinda ry’abashakashatsi babarirwa muri 20 b’Abanye-Congo, ku bufatanye n’impuguke mpuzamahanga ku burenganzira bwa muntu.

Ibyaha igarukaho byakorewe muri Congo Kinshasa birimo ubwicanyi, gufata ku ngufu ndetse n’ibitero byagabwe ku bana bikozwe n’imitwe yitwaje intwaro.

Iyo Raporo inashyira u Rwanda mu majwi ishinja ingabo zarwo kugira uruhare mu bwicanyi bwakorewe impunzi mu myaka irenga 20 ishize, gusa Leta y’u Rwanda yakunze kwamagana kenshi ibiyikubiyemo ivuga ko ari ibinyoma.