Amerika yakuye indege zayo z’intambara zari ku birindiro bya gisirikare bya RAF Fairford mu Bwongereza izisubiza ku birindiro byazo muri Leta Zunze Ubumwe za Amerika, nyuma y’impungenge z’umutekano zatewe n’umugambi ukekwa kuba wari ugamije kugaba igitero kuri ibyo birindiro.
Minisiteri y’Ingabo za Amerika, Pentagon, yemeje ko indege zose zayo zari zoherejwe kuri RAF Fairford zasubiye muri Amerika.
Icyemezo cyafashwe nyuma y’ifatwa ry’abantu batandatu bakekwaho kugira uruhare mu mugambi w’igitero cy’iterabwoba cyashoboraga kwibasira ibyo birindiro.
Ku cyumweru tariki ya 4 Ukwakira 2026 ni bwo ziriya ndege zo mu bwoko bwa B-1B Lancer zagaragaye zihaguruka kuri RAF Fairford, mu gihe Amerika yatangiraga kuzisubiza ku birindiro byazo byo ku butaka bwayo.
Reuters yatangaje ko hari B-1 zigera kuri 12 zari kuri RAF Fairford.
Izi ndege zari zarakoreshejwe mu bikorwa bya gisirikare bya Amerika byibasiye ibirindiro bya misile muri Iran.
Iki cyemezo cyafashwe nyuma y'uko abapolisi b'u Bwongereza bafatiye abantu batanu hafi ya RAF Fairford ku wa 27 Nzeri 2026, bakabakekaho ibyaha bifitanye isano no gutegura ibikorwa by’iterabwoba n’ibiturika.
Abapolisi bari bakurikiranye imodoka eshatu zarimo zigana hafi y’iki kibuga. Mu modoka habonetse lisansi, ariko nta bikoresho biturika byabonetse. Abo bantu batanu nyuma barekuwe by’agateganyo mu gihe iperereza rikomeje.
Ku wa 1 Ukwakira, polisi yongeye gufata umugabo w’imyaka 25 ufite ubwenegihugu bw’u Bwongereza na Iran, akekwaho gutegura ibikorwa by’iterabwoba bifitanye isano n’iki kibazo. Na we nyuma yarekuwe by’agateganyo.
Minisitiri w’Intebe w’u Bwongereza yavuze ko hari ibimenyetso bikomeye byerekana ko Iran ishobora kuba yaragize uruhare muri uwo mugambi. Iran yo yahakanye ibyo birego, ivuga ko nta shingiro bifite.
RAF Fairford ni kimwe mu birindiro by’ingenzi Amerika ikoresha mu Burayi mu bijyanye n’indege zayo z’ibisasu bya kure.
Mu mezi ashize, iki kibuga cyakoreshejwe n’indege za Amerika mu bikorwa bya gisirikare byibasiye Iran.
Kuba izo ndege zari hafi y’Uburasirazuba bwo Hagati byagabanyaga intera n’igihe byatwaraga kugira ngo zigere ku ntego.
Nubwo izo ndege zasubijwe muri Amerika, Pentagon yavuze ko indege za Amerika zirimo B-1, B-2 na B-52 zigifite ubushobozi bwo kugaba ibitero ku ntego aho ari ho hose, zihagurukiye ku birindiro byo muri Amerika.
Kugeza ubu, Amerika ntiyasobanuye mu buryo burambuye amakuru mashya y’umutekano yatumye ifata icyemezo cyo gukura indege zayo kuri RAF Fairford.