Banki yo mu Rwanda yareze Umunya-Kenya mu nkiko imwishyuza akayabo

Majanja avuga ko yabonye ibihamya by’uko Shah yagaragaye mu ntangiriro z’uru rubanza rwabanje kuburanishwa n’urukiko rukuru rw’ubucuruzi rw’i Kigali, ariko bikarangira atishyuye ibyo yari yategetswe kwishyura.

Ku ikubitiro uru rubanza rwari rwarabanje kuburanishwa muri Nyakanga umwaka wa 2019, hanzurwa ko uriya mugabo wahoze ari umuyobozi wa Nakumatt yishyura I&M Bank angana na 932,497,198Rwf, ariko ntiyayishyura.

Nyuma yo gushyikirizwa umwanzuro w’urubanza rwabereye i Kigali, David Majanja yavuze ko urukiko rwa Nairobi rugomba gushyira mu bikorwa umwanzuro wafashwe kubera ko Shah yanze kwishyura.

Impapuro zasohowe n’urukiko rw’ i Kigali zigaragaza ko ku wa 15 Nzeri 2018, I&M Bank yari yahawe umwanzuro n’urukiko ko uvuga ko Shah agomba kwishyura angana na 933,497,198Rwf, ndetse agatanga na 600,000Rwf yagombaga kwishyura abacamanza.

Shah yanze gutanga ariya mafaranga ahubwo ahitamo kujurira, gusa umucamanza Kibuka M. Jean-Lue uri muri uru rubanza, yanga ubujurire bwe ahubwo ategeka ko amafaranga yagombaga kwishyura abacamanza yiyongera akagera ku 900,000Rwf.

Amafaranga uyu Munya-Kenya ashinjwa kwambura I&M Bank ni ay’inguzanyo iyi banki yagiye imuha akayajyana muri kompanyi ye ya Nakumatt Rwanda.

Bivugwa ko muri Mutarama 2018 uyu mugabo yafatiye Nakumatt Rwanda inguzanyo y’arengaho gato 1,000,000,000Rwf, atanga isezerano ry’uko azayishyura nta mananiza mu gihe Nakumatt izaba inaniwe kuyatanga.

Ushinjwa ubwambuzi, Atulkumar Maganlal Shah nk’uko Business Daily ibitangaza, avuga ko nta bubasha agifite kuri Nakumatt, bityo akaba atazi uko imiterere y’iby’inguzanyo isigaye ihagaze.

Amakuru avuga ko Super Market ya Nakumatt irimo amadeni menshi itanafitiye ubushobozi bwo kwishyura, ari na yo yabaye intandaro yo kugira ngo ibe yaraguye mu gihombo.