Nibura abantu 64 baracyashakishwa nyuma y’uko ubwato bwari butwaye abarenga 120 burohamye mu ruzi rwa Sankuru mu ntara ya Kasai, mu burasirazuba bwo hagati bwa Republika ya Demokarasi ya Kongo.
Amakuru yemejwe n’ubuyobozi bwo mu gace byabereyemo, aho François Ahaka, umuyobozi w’akarere, yabwiye Associated Press ko ibi byabaye ku wa Mbere, hafi y’aho uruzi Sankuru rwinjira mu ruzi rwa Kongo, ahazwiho imihengeri y’amazi ikaze n’inkubi zikomeye.
Ahaka yagize ati: “Ubwato bwari butwaye abagenzi 120. Kugeza ubu hamaze kuboneka abantu 56 barokotse, abandi 64 bakaba baburiwe irengero. Ubutabazi buracyakomeje.”
Ubwato bwari buvuye mu mujyi wa Bena Dibele mu ntara ya Sankuru, bugana Kinshasa, intera irenga ibirometero 800 uva aho bwatangiriye.