Polisi ya Nigeria yemeye ubusabe bw’umuryango w’umuhanzi Ilerioluwa Oladimeji Aloba, wamenyekanye nka Mohbad, bwo kongera gukora iperereza ryimbitse ku cyateye urupfu rwe.
Ubu busabe bwemejwe n’Umuyobozi Mukuru wa Polisi ya Nigeria, Olatunji Disu, nyuma y’uko umuryango wa Mohbad usabye ko hakorwa iperereza rishya ku buryo bwuzuye.
Umwunganizi w’umuryango, Oladayo Ogungbe, yatangaje ko ubwo busabe bwashyikirijwe Umuyobozi Mukuru wa Polisi ku wa 14 Mata 2026, bukakirwa ku cyicaro gikuru cya Polisi i Abuja ku wa 7 Gicurasi.
Umuryango wavuze ko wasabye ko hakorwa iperereza rishya kubera ibyo ubona nk’ibitagenda kimwe mu iperereza ryabanje, ndetse usaba ko hakorwa isesengura rishingiye ku bimenyetso bya gihanga kugira ngo hamenyekane neza ibyabaye mbere y’urupfu rwa Mohbad.
Nyuma yo kwemezwa, ubusabe bwo kongera gukora iperereza bwoherejwe kuri Lagos State Police Command, kugira ngo bushyirwe mu bikorwa.
Polisi yahise iha iki kibazo itsinda ryo muri Special Enquiry Bureau, rishinzwe gukomeza iperereza. Umuryango wa Mohbad wavuze ko uhagarariwe n’umuntu wagiye ahura n’iri tsinda ry’abagenzacyaha kandi ko ukomeje gukorana na bo.
Iri tangazo ry’umuryango rije nyuma y’uko Urukiko Rukuru i Abuja rutesheje agaciro urubanza rwatangijwe ku wa 25 Nzeri 2026.
Umwunganizi w’umuryango yasobanuye ko urwo rubanza rwari rutandukanye n’ubusabe bwo kongera iperereza bwashyikirijwe Umuyobozi Mukuru wa Polisi. Yavuze ko urwo rubanza rutari rwatangijwe n’umuryango wa Aloba kandi ko rutari rufite uburenganzira cyangwa uruhare rwawo.
Umuryango wa Mohbad wasabye ko abaturage batitiranya iseswa ry’urwo rubanza n’iperereza rishya ryatangiye hashingiwe ku busabe bwawo.