Umugabo witwa Byangabiza Gervais wo mu murenge wa Mbazi mu Karere ka Huye, yabitswe ko yapfuye abo mu muryango we bacukura imva yo kumushyiriramo; gusa bagiye gutora umurambo we basanga ari muzima.
Abatuye muri kariya gace bavuga ko ku wa 01 Gashyantare Byangabiza yakomerekejwe n’umukozi wo muri rumwe mu ngo zigatuyemo amukubise icyuma kimeze nk’umukasi (Sécateur), biba ngombwa ko ajyanwa ku kigo nderabuzima cya Sovu aho yavanwe ajyanwa ku bitaro bya Kabutare.
Bigitangira nk’uko KT Press yabitangaje, ngo uriya mugabo yagiye kogoshesha umwana we maze asanga abogosha badahari, mu gutaha anyura ku rugo ruri hafi aho ngo bamushyirire umuriro muri telefone, kuko n’ubundi abaturanyi badafite amashanyarazi basanzwe baza gushyirishamo umuriro kuri urwo rugo.
Yasanze uwitwa Théogène Sibongiriye ari gutunganya ubusitani, bavuganye gato Byangabiza wari wasinze ngo amukubita ingumi, maze Sibongiriye na we mu kwitabara amutema ku kuboko no mu mutwe akoresheje cya gikoresho yakatishaga ibyatsi.
Abo mu rugo Sibongiriye yakoreraga bavuga ko urebye kurwanisha icyo gikoresho byari nko kwitabara kuko n’ubundi mu gace atuyemo abantu, cyane cyane abana, bakunze kumukubita bakanamutera amabuye, biturutse ku kuba afite ubumuga bw’amaguru.
Ntawe uzi ahavuye inkuru y’uko uyu mugabo yapfuye nyuma ya kugezwa kwa muganga, dore ko nta n’umurwaza bajyanye ubwo imbangukiragutabara yamujyanaga ku bitaro.
Mu gitondo cyo ku wa Gatatu tariki 2 Gashyantare abo mu rugo yakubitiwemo barafashwe bajya gufungwa, hanyuma uwamukubise abimenye yijyana kuri RIB bo barafungurwa.
Inzego z’ibanze ngo zasabye abo mu muryango Byangabiza yakubitiwemo gufasha umuryango we kumushyingura kuko ari abakene, maze mu gitondo cyo kuwa kane tariki 3 Gashyantare bashaka isanduku n’imodoka, bajya gushaka umurambo ku bitaro.
Ku bitaro babuze umurambo, hanyuma bakomeza gushakisha, baza kumusanga mu cyumba kimwe cy’ibitaro ari muzima arimo yinywera igikoma yari ahawe n’abantu bari kumwe bari bagemuriwe.
Ku wa Gatanu tariki 4 Gashyantare ibitaro byaramusezereye ajya kurwarira iwe.
Amakuru avuga ko imva yari yacukuriwe bayihambyemo umutumba barayisiba, na ho isanduku yari bushyingurwemo isubizwa mu gakiriro yari yaguzwemo.
2 Responses
Huye: Yacukuriwe imva bizwi ko yapfuye, bene we bagiye gufata umurambo basanga yinywera igikoma
Birababaje. Igihe tugezemo Koko ibi byabaho? Nta na nomero z’ivuriro bashatse Koko!? Uyu muntu n’ubusanzwe abe ntibamwitaho. Habuze n’umusura. Ibi ntibizongere kimwe no kumva ngo umuryango wagize ibyago ushyingura utari uwabo. Si iby’i Rwanda.
Huye: Yacukuriwe imva bizwi ko yapfuye, bene we bagiye gufata umurambo basanga yinywera igikoma
Birababaje. Igihe tugezemo Koko ibi byabaho? Nta na nomero z’ivuriro bashatse Koko!? Uyu muntu n’ubusanzwe abe ntibamwitaho. Habuze n’umusura. Ibi ntibizongere kimwe no kumva ngo umuryango wagize ibyago ushyingura utari uwabo. Si iby’i Rwanda.