Umutwe wa M23 uhanganye n’Igisirikare cya Repubulika Iharanira Demokarasi ya Congo (FARDC), uravugwaho kuba uri kugenzura undi mupaka uhuza DRC na Uganda witwa Kitagoma mu mirwano yamaze amasaha agera ku icyenda.
Kitagoma ni umupaka uhuza Repubulika Iharanira Demokarasi ya Congo na Uganda, bikavugwa ko uri kugenzurwa na M23 kuva kuri uyu wa Mbere tariki 20 Kamena 2022. Uherereye mu birometero 20 uvuye mu Mujyi wa Bunagana na wo ubu ugenzurwa n’uyu mutwe wa M23. Radio Okapi ya LONI ivuga ko M23 yakozanyijeho na FARDC mu mirwano yamaze amasaha ari hagati y’umunani n’icyenda mu duce twa Bikenge na Shangi, muri Gurupoma ya Bweza, muri Teritwari ya Rutshuru mu Ntara ya Kivu ya Ruguru. M23 kandi kuri uyu wa mbere, wafunguye umupaka wa Bunagana uhuza DRC na Uganda, uha ikaze abaturage bari barahungiye muri Uganda. Umuvugizi wa M23, Maj. Willy Ngoma, wafunguye ku mugaragaro uyu mupaka wa Bunagana, yavuze ko bifuza ko abaturage bahunze batahuka, bagakomeza ibikorwa byabo ndetse n’abana bagasubira ku ishuri. BWIZA yavuganye na Maj. Willy Ngoma, aravuga ngo ” Ibyo ni ukubeshya, Ubu ndi i Bunagana. Turi Bunagana, ejo twafunguye Bunagana. Abaturage bari kugaruka mu rugo. Ibyo kuba twahavuye ni ukubeshya, nta shingiro bifite.” Aya makuru FARDC ntacyo irayatangazaho. M23 iravugwaho guhangana na FARDC, mu gihe inama y’Abakuru b’Ibihugu bigize Umuryango wa Afurika y’Iburasirazuba yateranye kuri uyu wa Mbere tariki 20 Kamena yemeje ko imitwe yitwaje intwaro yose iva mu bice iri kugenzura, igahagarika imirwano. Iyi nama yitabiriwe na Perezida Paul Kagame, Felix Tshisekedi, Evariste Ndayishimiye, Yoweri Museveni, Salva Kiir na Uhuru Kenyatta, yanatsindagiye icyemezo cyo kohereza muri DRC itsinda ry’Ingabo rihuriweho ryo kurandura imitwe yitwaje intwaro irimo n’uyu wa M23.
4 Responses
M23 iravugwaho gufata undi mupaka mu mirwano yamaze amasaha icyenda
Nibagezaho!!
M23 iravugwaho gufata undi mupaka mu mirwano yamaze amasaha icyenda
Nibagezaho!!
M23 iravugwaho gufata undi mupaka mu mirwano yamaze amasaha icyenda
Nibagezaho!!
M23 iravugwaho gufata undi mupaka mu mirwano yamaze amasaha icyenda
Nibagezaho!!