Minisante yemeje ko hari abaganga banduye Covid-19

Minisitiri w’ubuzima, Dr Daniel Ngamije, yavuze ko mu barwayi banduye icyorezo cya Covid-19 igihugu gifite harimo n’abaganga.

Minisitiri Ngamije yemeje ayo makuru kuri uyu wa Gatanu, ubwo yari muri Studio za Radiyo y’Igihugu asobanura ingamba nshya zo kwirinda ikwirakwizwa rya Covid-19 zaraye zifatiwe mu nama y’Abaminisitiri.

Hari hamaze iminsi hari amakuru avuga ko hari abaganga banduye icyorezo cya Covid-19, gusa hari harabuze uwemeza niba koko ayo makuru ari impamo.

Ubwo Minisitiri Ngamije yabazwaga ayo makuru, yagize ati: “Mu byumweru bitatu bishize igihe hari habayeho ukwiyongera kw’abarwayi ba Covid-19 bamwe bakaza kwa muganga badafite ibimenyetso bikabije, basa n’abaje kwivuza indwara zisanzwe, hagiye habaho ukwandura kw’abaganga babakira, cyane cyane ahavurirwa indembe.”

Minisitiri w’Ubuzima yavuze ko kuba bariya baganga baranduye bifite aho bihurira no kubahiriza ingamba zo kwirinda Covid-19, cyane abakozi bo kwa muganga yibukije ko bagomba gutanga urugero, ngo kuko abarwanyi bose babagana atari ko baba bazi icyo bose barwaye.

Imibare ya Minisiteri y’Ubuzima igaragaza ko kuva muri Werurwe icyorezo cya Covid-19 cyagaragara mu Rwanda, abantu 4,479; barimo abagikize babarirwa muri 2,352 na 22 cyahitanye.

Minisitiri w’ubuzima yavuze ko mu barenga 2,100 bakirwaye kiriya cyorezo harimo bane barembye cyane ndetse n’abandi 11 bari kwitabwaho mu buryo bw’umwihariko.

Minisitiri Ngamije yavuze ko urebye uko icyorezo gihagaze mu minsi itandatu ishize bisa n’aho imibare y’ubwandu yatangiye kugabanuka, ibitanga ikizere cy’uko icyorezo gishobora kuzatsindwa.

Yafuze ko uko kugabanyuka gufitanye isano n’ingamba ziheruka gushyirwaho na Guverinoma y’u Rwanda, ngo kuko no mu busanzwe iyo Coronavirus ifatiwe ingamba igabanyuka, abaturage batezuka imibare ikongera ikazamuka.