Rubavu: Ubuyobozi n’umuryango wa Tuyishime wapfiriye muri gereza ntibavuga rumwe ku rupfu rwe

Umuryango w’uwitwa Tuyishime Jean Pierre warokotse Jenoside yakorewe Abatutsi utuye mu murenge wa Rugerero muri Rubavu, urasaba guhabwa ubutabera uvuga ko yakubiswe bikamuviramo urupfu, ubuyobozi bwo buhakana ibivugwa buvuga ko ko nta wakubise Nyakwigendera.

Umuryango wa uvuga ko mbere y’uko yitaba Imana yakubiswe ijeki n’umushoferi wa Tagusi witwa Niyitegeka Jean, ukavuga ko izi nkoni ari zo zabaye intantaro y’urupfu rwe.

Intandaro y’amakimbirane ya Tuyishime wari uzwi nka “Street Passenger” na Niyitegeka ngo yabaye igiceri cy’amafaranga ijana nk’uko umuryango we ubisobanura.

Ngo bigitangira Tuyishime yasezeranye n’uriya mushoferi kumushakira abagenzi (dore ko ari ko kazi yakoraga) akamuha 1,00Rwf. Byabereye mu Rugerero aho tagizi ziva n’izijya i Gisenyi zihagarara.

Imodoka ya Niyitegeka ngo imaze kuzura yanze gutanga cya giceri nkuko yari yabyemeye, birangira Tuyishime atangiye kubwira uwo mushoferi amagambo mabi nkuko byemezwa n’abo mu muryango we.

Nyuma ngo yaje gukubita umushoferi akaboko ku izuru ava amaraso, undi na we amukubita ijeki.

Umushoferi n’abo bari kumwe ngo bafashe Tuyishime bamujyana kuri Sitasiyo ya RIB iri ku murenge wa Rugerero, aho yavanwe ajya gufungirwa kuri Stasiyo ya Polisi ya Gisenyi.

Akigera muri Gereza ngo yaje gufatwa n’uburwayi bw’abayobera, nyuma aza kujyanwa ku bitaro bya Gisenyi ari na ho yaguye.

Nzabonimpa Jean de Dieu na Byakweli Narcise bavukana na Nyakwigendera, bavuga ko bafite abatangabuhmya bemeza ko uyu muvandimwe wabo yakubiswe biturutse ku magambo ashingiye ku ivangura Niyitegeka yabwiwe n’abari aho amakimbirane yabereye.

Nzabonimpa Avuga ko umuvandimwe we akimara gukubita umushoferi akaboko akava amaraso, Abari aho batangiye gusesereza uwo mushoferi bavuga ko abantu bo mu mudugudu mudugudu [Umudugudu w’abarokotse Jenoside nyakwigendera yari atuyemo] bibonye.

Ibi ngo ni na byo basembuye uriya mushoferi, yemera no gutega moto amwirukankaho kugeza amufashe akamuhondaguza ijeki umubiri wose.

Kugeza ubu haracyategerejwe ibizamini bya muganga byemeza niba uyu Tuyishime yarishwe n’inkoni yakubiswe, cyangwa yarishwe n’uburwayi busanzwe yari afite, bufitanye isano n’ingaruka za Jenoside.

Umuryango uharanira inyungu z’abarokotse Jenoside Ibuka mu Murenge wa Rugerero uvuga ko ko wakurikiranye iki kibazo, ukaza gusanga hari uburangare bwabayemo mu korohereza Tuyishime kwivuza mu gihe yari muri Gereza ya Rubavu.

Habiyaremye Kalim Uyobora Ibuka mu murenge wa Rugerero, avuga ko Tuyishime yari asanganwe n’ubundi burwayi bukomoka ku ngaruka za Jenoside.

Habiyaremye Avuga ko batahamya ko urupfu rwe rwaturutse ku nkoni yakubiswe mu gihe batarabona icyemezo cya Muganga.

Umunyamabanga Nshingwabikorwa w’umurenge wa Rugerero, Nkurunziza Faustin, we avuga ko urupfu rw’uyu musore rwabaye, akemeza ko nyakwigendera yari yemereye ubugenzacyaha ko yakubise umushoferi, ari nacyo cyaha yari akurikiranweho.

Nkurunziza kandi avuga ko Tuyishime yabajijwe akiri muzima niba yakubiswe, agasubiza ko nta wamukubise ari nayo mpamvu ashingiraho avuga ko intandaro y’urupfu rwe izamenyekana ibizamini bya Muganga byasohotse.