Ruhango: Babiri bakurikiranwe bakekwaho kwica umwarimukazi

Umuyobozi w’Akarere ka Ruhango, Habarurema Valens yavuze ko abo bagabo bombi bari basanzwe bajya mu rugo rwa Mukakalisa Chantal buri gihe.

Meya Habarurema ati ” Uwo Mwarimukazi amaze kwitaba Imana, RIB yahise ita muri yombi Mukakalisa Chantal, n’abo bagabo babiri ubu dosiye iri mu bugenzacyaha dutegereje ikizavamo.”

Gusa uyu Muyobozi avuga ko iperereza ari ryo rizagaragaza uruhare rwa buri wese mu rupfu rwa Uwimana Monique. Yavuze ko amakuru bafite yemeza ko abo bagabo bahoraga basura uyu mugore Mukakalisa.

Bwiza.com yashatse kuvugana n’Umuvugizi w’Ubugenzacyaha mu Rwanda (RIB), Marie Michelle Umuhoza ku murongo wa telefoni ntibyakunda. Ubutumwa bugufi yamwandikiye ntiyari yakabusubije ubwo iyi nkuru yasohokaga. Bwiza.com ikaza gutangaza icyo iri bubwirwe ku itabwa muri yombi ry’aba bagabo babiri.

Hari amakuru avuga ko mu ijoro Uwimana, wigishaga ku Ishuri ribanza rya Mahembe riherereye mu Murenge wa Byimana mu Karere ka Ruhango, yapfiriyeho umwe muri aba bagabo yari ahari. Nta rwego bireba rwari rwemeza aya makuru.

Itegeko Nº68/2018 ryo ku wa 30/08/2018 riteganya ibyaha n’ibihano muri rusange Ingingo ya 107: Ubwicanyi buturutse ku bushake n’uko buhanwa Umuntu wica undi abishaka, aba akoze icyaha. Iyo abihamijwe n’urukiko, ahanishwa igihano cy’igifungo cya burundu.