Sénégal yegukanye Igikombe cya mbere cya Afurika itsinze Misiri ku mukino wa nyuma (Amafoto)

Ikipe y’Igihugu ya Sénégal, Les Lions de la Teranga, yegukanye Igikombe cya Afurika ku nshuro yayo ya mbere itsinze ku mukino wa nyuma Les Pharaohs ya Misiri kuri penaliti 4-2.

Ni nyuma y’uko iminota 120 y’umukino wa nyuma amakipe yombi yari yahuriyemo yari yarangiye anganya 0-0.

Misiri ya Mohamed Salah yashakaga igikombe cya Afurika ku nshuro yayo ya munani mu mateka, mu gihe Sénégal ya Sadio Mané basanzwe bakinana muri Liverpool yagishakaga bwa mbere nyuma yo kugitakaza incuro ebyiri zirimo n’igiheruka cya 2019 yatwawe na Algérie iyitsinze igitego 1-0.

Sénégal yatangiye uyu mukino wari utegerejwe na benshi ndetse inawuyobora kugeza ku munota wa nyuma, gusa inanirwa kubyaza umusaruro uburyo bwinshi bw’ibitego yagiye ibona.

Iyi kipe y’umutoza Alliou Cissé yabonye uburyo butanu bw’ibitego, inatera amashoti arindwi yose yakuwemo n’umunyezamu wa Misiri.

Misiri yakinaga ahanini yugarira yo yaremye uburyo bw’ibitego bune, inatera amashoti atatu yaganaga mu izamu.

Penaliti yo ku munota wa karindwi w’umukino ya Sadio Mané yakuwemo n’umunyezamu Gabaski iri mu buryo buremereye bwaranze uyu mukino.

Mané ni we wateye penaliti ya nyuma yahesheje Sénégal igikombe, anatorwa nk’umukinnyi mwiza waranze irushanwa, mu gihe umunyezamu mugenzi we Edouard Mendy wakuyemo penaliti ya Mohanad Lasheen yatowe nk’umunyezamu w’irushanwa.