Ifatwa ry’umujyi wa Uvira ku itariki ya 10 Ukuboza 2025, ufatwa n’abarwanyi ba AFC/M23 ryahise rivana mu ntambara Ingabo z’u Burundi zoherejwe gufasha Ingabo za Congo, bituma hahita haba impinduka zikomeye za gisirikare muri ayo makimbirane, nk’uko raporo yashyizwe ahagaragara muri Mata 2026 n’Itsinda ry’Ubushakashatsi kuri Congo (CRG) n’Ikigo cy’Ubufatanye Mpuzamahanga (CIC) muri Kaminuza ya New York.
Abasirikare bari hagati y’ibihumbi cumi na bibiri (12.000) n’ibihumbi cumi na bitanu (15.000) mu Ngabo z’igihugu cy’u Burundi (FDNB) bari boherejwe ku rugamba mu burasirazuba bwa Congo kurwanya ihuriro rya AFC/M23. Ifatwa rya Uvira, umujyi uhana imbibi n’u Burundi uherereye ku nkombe z’Ikiyaga cya Tanganyika, byatumye abo basirikare batabasha kongera kugera ku murongo w’imbere w’urugamba no mu birindiro byabo.
Iyi raporo ivuga ko uruhare rw’u Burundi muri aya makimbirane ruturuka ku guhangana mu buryo butaziguye n’u Rwanda. U Burundi bwari busanzwe, ku rwego rwo hasi, bujya muri Kivu y’Amajyepfo kurwanya RED-Tabara, umutwe w’inyeshyamba z’Abarundi bushinja u Rwanda gufasha, watumye, ku ruhande rumwe, Bujumbura yishyira hamwe byuzuye na Kinshasa mu kurwanya M23.
Ifatwa rya Uvira ryateje kandi amakimbirane mu ihuriro ry’ingabo zirwanira ubutegetsi ubwaryo. Hadutse imirwano hagati y’inyeshyamba za Wazalendo, zashyizwe hamwe na Guverinoma ya Congo ngo zifashe FARDC kurwanya M23, ndetse rimwe na rimwe haba gukozanyaho hagati y’izi nyeshyamba n’Ingabo za leta ubwazo.
Abarwanyi ba Wazalendo bashinjaga abasirikare ba leta n’ababashyigikiye guhunga urugamba. Ku itariki ya 15 Ukuboza 2025, umuhuzabikorwa wa AFC, Corneille Nangaa, yaje gutangaza ko M23 yavuye mu Mujyi wa Uvira, nk’igikorwa cyo kubaka icyizere bisabwe n’abunzi b’Abanyamerika.
Nyuma yo kuhava, ku itariki ya 18 Mutarama 2026, nibwo Ingabo za Congo zatangaje ko zongeye kwigarurira umujyi, Ingabo z’u Burundi na zo zibasha kongera gusubirayo.
Ifatwa rya Uvira kandi ryari kugira ingaruka zikomeye ku bukungu bw’u Burundi kuko Repubulika ya Demokarasi ya Congo ari yo mufatanyabikorwa mukuru usigaye w’u Burundi mu bucuruzi nyuma y’uko bufunze imipaka yabwo n’u Rwanda.
