Umuhanzi Diamond Platnumz ashobora kuba yaranduye Coronavirus

Hari impungenge ko umuhanzi w’ikimenyabose muri Tanzania no muri Afurika, Diamond Platnumz ko yaba afite virusi ya Covid-19 n’ubwo nta bimenyetso byayo aragaragaza.

Izi mpungenge zije nyuma y’uko umureberera inyungu, Sallam SK amaze iminsi atangaje ko nyuma yo kigaragaza mi bimenyetso ibipimo byagaragaje ko yanduye iki cyorezo cya Coronavirus. Nyuma y’ibi kandi, umutunganyiriza umuziki wihariye, Lizer Classic ejo na we yatangaje ko yasanganywe iyi virusi ya Covid-19 akaba yemeza ko yayandujwe na Sallam SK kuko bahoranye cyane mbere y’uko agaragaraho iki cyorezo.

Diamond mu mvugo ye yagaragaje ubwoba n’impungenge zo kuba umuntu igihe atarishyira mu kato cyangwa ngo yipimishe ashobora kwanduza abandi na we atabizi. Yagize ati”Umuntu ashobora kumarana iyi virusi iminsi irenga 10 ataragaragaza ibimenyetso bikaba byashoboka ko yanduza abandi na we atabizi.”

Diamond ni umuyobozi w’inzu ifasha abahanzi mu bya muzika ikanawutunganya Wasafi,WCB, yasohoye amashusho asaba buri wese kuguma mu rugo avuga ko ari mu kato kuva umujyanama we Sallam SK yakwandura Coronavirus ku wa 19 Werurwe 2020.

Producer Lizer Classic yakoze indirimbo nyinshi za Diamond Platnumz zirimo nka “Inama”,”African Beauty”,”Kwangwaru”,”Sikomi”,”Waka”,”Niache” n’izindi.

Minisiteri y’Ubuzima muri Tanzania ejo yabaruraga abantu 19 banduye coronavirus gusa mu gitondo cyo kuri uyu wa Mbere yongeye itangaza ko umwe yitabye Imana azize iyi virusi ya Covid-19.