Umunyarwanda yabaye uwa 2 mu gace ka 3 ka Tour du Caméroun

Umunyarwanda Mugisha Moïse ukinira ikipe y’Igihugu y’amagare, kuri uyu wa mbere yabaye uwa kabiri mu gace ka gatatu k’isiganwa rya Tour du Caméroun.

Mu gace ka gatatu k’iri siganwa abakinnyi bari bahagurutse ahitwa Obala berekeza mu gace ka Ndikinimeki, ku ntera y’ibilometero 148.5.

Umunya-Maroc Maatougui Eddine ukinira ikipe y’igihugu cye ni we wegukanye aka gace akoresheje amasaha status, iminota 36 n’amasegonda 44.

Yarushaga amasegonda abiri yonyine Mugisha Moïse wamukurikiye na Nzafashwanayo Jean Claude wabaye uwa gatatu.

Undi munyarwanda witwaye neza ni Muhoza wabaye uwa gatanu arushwa amasegonda atanu na Eddine na ho Tuyizere Etienne aba uwa 20 akurikirwa na Munyaneza Didier ‘Mbappé’ bombi barushwa umunota umwe n’amasegonda 18.

Nyuma y’uduce dutatu urutonde rusange ruyobowe n’Umufaransa Vincent Graczyk umaze gukoresha amasaha icyenda, iminota 12 n’amasegonda 16.

Uyu akurikiwe na Tientcheu Michel wa Velo Club Cameroun arusha amasegonda 11.

Umunyarwanda uri hafi ni Munyaneza Didier uri ku mwanya wa gatandatu arushwa umunota umwe n’amasegonda arindwi na Graczyk wambaye Maillot Jaune.