Yoweri Museveni yatorewe kuyobora Uganda muri manda ya gatandatu

Komisiyo y’amatora mu gihugu cya Uganda, yemeje ko Perezida w’iki gihugu, Yoweri Kaguta Museveni yatorewe kuyobora kiriya gihugu muri manda ya gatandatu yikurikiranya, nyuma yo gutsinda amatora y’umukuru w’igihugu yabaye ku wa Kane Tariki ya 14 Mutarama.

Amajwi yatangajwe arerekana ko Museveni yatowe n’abanya-Uganda babarirwa muri 5,851,037 bangana na 58.64% by’abatoye

Museveni yatsinze Robert Kyagulanyi uzwi nka Bobi Wine watowe n’ababarirwa muri 3,475,298 bangana na 34.83% by’abatoye bose.

11:20: Museveni arakoza imitwe y’intoki kuri manda ya gatandatu yo kuyobora Uganda

Amajwi y’agateganyo amaze gutangazwa na Komisiyo y’Amatora, arerekana ko Perezida Museveni akiyoboye ku majwi 58.89%, mu gihe amajwi amaze kubarurwa angana na 91.11% by’amajwi y’abatoye bose.

Bobi Wine bahanganye ni we ukomeje kumugwa mu ntege n’amajwi 34.55%, mu gihe Patrick Amuriat agifite amajwi 3.29%.

Nta gihindutse amajwi ya nyuma aratangazwa saa cyenda z’amanywa, ari na bwo hamenyekana uwatsindiye kuyobora Uganda by’agateganyo.

09:30: Amajwi ya Museveni akomeje kugabanuka

Ikiciro cya karindwi cy’amajwi y’agateganyo y’amatora y’Umukuru w’igihugu muri Uganda yatangajwe, kirerekana ko amajwi ya Perezida Museveni akomeje kumanuka, mu gihe aya mukeba we Bobi Wine ari kuzamuka.

Mu gihe hamaze kubarurwa amajwi angana na 86.6% y’abatoye bose, Museveni aracyari imbere n’amajwi 58.83%.

Honorable Robert Ssentamu Kyagulanyi aramugwa mu ntege n’amajwi angana na 34.62%.

Bijyanye n’amajwi yaherukaga gutangazwa mu ijoro ryakeye, biragaragara ko amajwi ya Perezida Museveni yongeye kugabanukaho hafi 3%, mu gihe aya Bobi Wine yazamutseho 4%.

Cyakora cyo Perezida Museveni ari gukoza imitwe y’intoki ku ntsinzi, bijyanye n’uko amajwi asigaje kubarurwa ari makeya cyane.

Umukandida w’Ishyaka FDC Patrick Oboi Amuriat aracyari uwa gatatu n’amanota 3.29%.

07:30: Ishusho y’umunsi wa mbere w’ibarura

Umunsi wa mbere w’ibarura ry’amajwi wasize Perezida Yoweri Kaguta Museveni abonye amajwi 4,340,134 angana na 61.98% by’amajwi 7,280,677 yari amaze kubarurwa.

Bobi Wine bahanganye cyane ni we wamugwaga mu ntege n’amajwi 2,164,347 angana na 30.91%.

Mu gihe igikorwa cyo kubarura amajwi kigikomeje, Bobi Wine mu kiganiro yagiranye n’Itangazamakuru yamaganye ibikomeje gutangazwa na Komisiyo y’amatora, ashimangira ko ari we Perezida watowe.

Bobi Wine wavuze ko ariya matora yabayemo uburiganya bwa mbere mu mateka, yasabye abanya-Uganda guhaguruka bagahagarara, bakarinda amajwi yabo.

Ibi yabivuze mu gihe igisirikare cya Uganda cyari cyakikije urugo rwe, kugera aho kirenga uruzitiro kikamusanga iwe mu rugo.

Bobi Wine kuri Twitter yavugaga ko bagoswe, yungamo ko ubuzima bwe buri mu kaga gakomeye.

Polisi ya Uganda n’igisirikare bavuze ko bakikije urugo rwa Kyagulanyi kubera ko nk’umukandida Perezida akeneye gucungirwa umutekano.

Byitezwe ko uwatsinze amatora by’agateganyo amenyekana ku mugoroba wo kuri uyu wa Gatandatu tariki ya 16 Mutarama.