Abagaba Bakuru b’Ingabo z’ibihugu bigize Umuryango wa Afurika y’Iburasirazuba (EAC), bategetse ko mu burasirazuba bwa Repubulika Iharanira Demokarasi ya Congo hahita hoherezwa izindi ngabo za EAC zo kuhagarura amahoro.
Byemerejwe mu nama abagaba bakuru b’Ingabo za EAC baheruka gukorera i Nairobi mu gihugu cya Kenya, nyuma y’iy’abakuru b’ibihugu by’uyu muryango yabereye i Bujumbura mu Burundi mu cyumweru gishize.
The East African ivuga ko uretse kohereza Ingabo muri RDC, abagaba bakuru b’Ingabo za EAC banemeranyije kohereza Ingabo mu bice byahoze bigenzurwa na M23 mbere yo kubivamo; mu rwego rwo kurinda abasivile.
Umugaba Mukuru w’Ingabo z’u Burundi, Gen Prime Niyongabo wayoboye iriya nama, ngo yagaragaje ko hari icyizere cy’uko imyanzuro yayifatiwemo izagira uruhare mu kuzana amahoro arambye ndetse n’umutekano muri RDC.
Ati: "Mfite icyizere cy’uko kohereza Ingabo z’akarere zasigaye bizomgerera imbaraga Ingabo z’akarere mu kuzuza inshingano zazo."
Biteganyijwe ko Ingabo zigomba guhita zoherezwa muri Congo ari iz’ibihugu bya Uganda na Sudani y’Epfo zatinze koherezwa kubera ko Leta ya Congo Kinshasa yari yaratinze gutanga uruhushya ruzemerera kwinjira muri icyo gihugu.
Izi ngabo muri Congo zigomba kuhasanga iz’u Burundi ziri muri Kivu y’Amajyepfo ndetse n’iza Kenya zoherejwe mu ntara ya Kivu y’Amajyaruguru.
Iyi ntara kuri ubu ikomeje kuberamo imirwano ikaze hagati y’Ingabo za Congo Kinshasa ndetse n’inyeshyamba za M23 zikomeje kwigarurira ibice bitandukanye byayo.
Ingabo za Kenya kuva zagera muri Kivu y’Amajyaruguru cyakora cyo kuva zagera muri RDC mu Ugushyingo umwaka ushize ntizirinjira mu mirwano, bijyanye n’uko abayobozi b’akarere bashyize imbere gahunda y’ibiganiro nk’iyazana umuti w’ibibazo Congo Kinshasa ifite.
Amakuru cyakora cyo avuga ko bishobora kurangira Ingabo za EAC zinjiye mu mirwano, bijyanye no kuba M23 ikomeje kotsa igitutu Ingabo za Leta ya Congo, ibikomeje kuzamura ubwoba bw’uko inyeshyamba z’uriya mutwe zikomeje kwigarurira Umujyi wa Goma zikomeje gusatira.
Tanga igitekerezo