Arsenal yahagamiwe na Tottenham mu maso ya P. Kagame

Ikipe ya Arsenal yaguye miswi na Tottenham Hotspur ibitego 2-2, mu mukino wa shampiyona y’Abongereza warebwe n’abarimo Perezida Paul Kagame.

The Gunners yari yakiriye Spurs i Emirates Stadium, mu mukino w’umunsi wa gatandatu wa Premier league wabaye ku Cyumweru.

Arsenal yafunguriwe amazamu na myugariro Christian Romero witsinze igitego ku munota wa 26 w’umukino; mbere y’uko Kapiteni Heung-Min Son yishyurira Tottenham ku munota wa 42 w’umukino.

Bukayo Saka yafashije Arsenal kongera kuyobora umukino nyuma yo kuyitsindira igitego cya Penaliti ku munota wa 54 w’umukino; gusa Son aza kongera kucyishyura nyuma y’umunota umwe.

Perezida Paul Kagame usanzwe ari umukunzi w’imena wa Arsenal ari mu bakurikiranye uyu mukino.

Ifoto bigaragara ko yafashwe mbere y’umukino yerekana Umukuru w’Igihugu ari hanze ya Emirates Stadium, ari kumwe na Nwankwo Kanu.

Uyu munya-Nigeria wakiniye Arsenal hagati ya 1999 na 2004 yari anari kumwe na madamu we, Amara Kanu.

Perezida Kagame ni umufana wa Arsenal kuva mu 1996, aho avuga ko ayikundira umukino mwiza ikina yatsinda cyangwa igatsindwa; ibituma rimwe na rimwe ajya kuyireba mu Bwongereza.

Iyi Arsenal ifitanye umubano n’u Rwanda kuko kuva muri Gicurasi 2018 Urwego rw’Igihugu rw’Iterambere (RDB) rwinjiye mu bufatanye n’iyi kipe ya Arsenal FC yo muri Premier League, u Rwanda ruyibera umuterankunga wa mbere ku maboko y’imipira, aho yambara ‘Visit Rwanda’ ku kuboko kw’ibumoso ku ikipe nkuru, iy’abatarengeje imyaka 23 no mu ikipe y’abagore.