![Byiringiro na Mukunzi Yannick bazamuye Sandvikens IF](local/cache-vignettes/L1000xH750/lagu-5a7f1.jpg)
Abanyarwanda Byiringiro Lague na Mukunzi Yannick bazamuye Sandvikens IF muri shampiyona y’icyiciro cya kabiri cy’umupira w’amaguru muri Sweden, Superettan.
Iyi kipe ipfundikiye shampiyona y’icyiciro cya gatatu, Ettan, yari igizwe n’imikino 30, igize amanota 65, ikaba ikurikiwe na United Nordic yagize amanota 62.
Kuri uyu munsi wa nyuma wa shampiyona, Sandvikens IF yatsinze Umea ibitego 3-2, ibifashijwemo na John Junior Igbarumah, Jann Lenartik Vikgren na Per Daniel Soderberg. Byiringiro na Mukunzi bakinnye umukino wose.
Iyi kipe imaze gukatisha itike y’icyiciro cya kabiri cya shampiyona, abakinnyi bayo babyinnye intsinzi, baturitsa ibishashi, bamena inzoga zihenze nk’uburyo bwo kugaragaza ibyishimo. Superettan na yo yahise igira iti: “Turashimira, tunaha ikaze Sandvikens IF muri Superettan.”
Sandvikens IF ni ikipe yashinzwe mu mwaka w’1918. Mu mateka yayo yakinnye muri shampiyona y’icyiciro cya mbere imyaka 21. Umwanya w’icyubahiro yegukanye ni uwa 3 mu cyiciro cya mbere, mu mwaka w‘1935-1936.
Tanga igitekerezo