Rutahizamu Cristiano Ronaldo ukomoka muri Portugal yashimagije shampiyona y’icyiciro cya mbere mu mupira w’amaguru muri Saudi Arabia, ayigereranya n’izikomeye zo ku mugabane w’Uburayi.

Mu kiganiro n’abanyamakuru ubwo yari mu myiteguro yo gushaka itike y’irushanwa ry’amakipe y’ibihugu by’i Burayi, Euro 2024, yabajijwe uko yakiriye kuva muri shampiyona yo mu Bwongereza iri ku mwanya wa mbere mu zikomeye ku Isi, akajya muri Saudi Arabia.

Cristiano yatangaje ko yatunguwe no guhatana yasanze muri shampiyona yo muri iki gihugu . Ati: “Saudi ni shampiyona irimo guhatana gukomeye. Ntabwo ari Premier League, ntabwo nabeshya ariko ni shampiyona yantunguye mu buryo bwiza.”

Uyu mukinnyi yavuze ko mu gihe shampiyona ya Saudi Arabia yakomeza kugendera mu mujyo iriho ubu, mu myaka itarenga 7 yazaba iri ku rutonde rwa shampiyona enye nziza ku Isi. Ati: “Mu myaka 5,6,7, mu gihe bakomeza iyi gahunda, izaba iri ku mwanya wa 4, 5 ku Isi.”

Shampiyona yo muri Saudi Arabia (Pro League) iri ku mwanya wa 66 ku rutonde rw’izikomeye ku Isi. Iyo mu Bwongereza irabanza, hagakurikiraho La Liga yo muri Espagne, Bundesliga yo mu Budage igakurikiraho.

Izindi Nkuru Bijyanye

Abakinnyi ba Manchester United banze kwambara amakoti ashyigikira abatinganyi

Nduhungirehe na Minisitiri w’Intebe w’u Bwongereza bashyigikiye Arsenal itsinda Man United

FIFA yasabwe kwima Arabie Saoudite uburenganzira bwo kwakira Igikombe cy’Isi