Urwego rw’igihugu rw’Ubugenzacyaha (RIB) na Minisiteri y’ibidukikije byatangije ikoreshwa ry’indege zitagira abapilote mu kurwanya ibyaha byibasira ibidukikije.

Ibyaha byibasira ibidukikije ni igikorwa kitemewe cyangiza ibidukikije kandi nicyo cyaha cya kane gikorwa n’abantu benshi ku Isi. Ni icyaha cyiyongera ku rugero rwa gatanu na karindwi ku ijana buri mwaka, nk’uko raporo zibitangaza.

Indege zitagira abadereva (drones) zizakusanya amakuru, zikore ubugenzuzi bwo gukumira, kandi zunganire iperereza ku byaha byibasira ibidukikije.

Minisitiri w’ibidukikije Jean d’Arc Mujawamariya yagize ati: "Indege zitagira abadereva zizafasha mu gusubiza no kugenzura ibikorwa byangiza ibidukikije birimo kwangiza ubutaka, kwanduza amazi, ndetse no gutema ibiti mu buryo butemewe mu turere dukingiwe."

Ati: “Turashimira Urwego rw’Igihugu rw’Ubugenzacyaha (RIB) rwifatanije natwe mu kurwanya iyangirizwa ry’ibidukikije aho bakoze ubukangurambaga ku byaha byangiza ibidukikije, bagaragaza abagizweho ingaruka n’ibi byaha byangiza ibidukikije, abakoze ibyaha ndetse banafungura dosiye z’ubushinjacyaha”.

Yavuze ko raporo zasanze ibikorwa bikunze kugaragara byangiza ibidukikije biri mu bucukuzi bw’amabuye y’agaciro butemewe, abaturage bibasira uduce turinzwe, cyane cyane parike, inkombe z’umugezi, ndetse n’umwanda uhumanya amazi.

Ati: “Iyi drone yongeye gushimangira imirimo isanzweho yo gukora ubugenzuzi bwo gukumira, gutahura, no gukora iperereza ku byaha byangiza ibidukikije mu gihugu hose. Iyi drone izafasha gukusanya amakuru avuye ahantu habujijwe kandi amakuru n’amakuru nyayo azatanga umucyo ku bikorwa bizakurikira ”.

Minisitiri yavuze ko ubufatanye na RIB buzashingira ku bufatanye bwiza busanzwe hagati ya Polisi y’u Rwanda n’ikigo cy’igihugu gishinzwe imicungire y’ibidukikije (REMA) hagamijwe gushyiraho amatsinda ahuriweho n’inzego z’umutekano ku rwego rw’akarere ndetse n’ibindi bigo bireba kugira ngo bafate ingamba zikwiye mu guhagarika ibikorwa byangiza ibidukikije.

Izindi Nkuru Bijyanye

FARDC nta mbaraga ifite zo guhangana na M23: Jean Pierre Bemba

Dore ibyo Tshisekedi yemereye Kabila kugirango amuhe ubutegetsi

Tshisekedi arashaka kunesha M23 hanyuma akajya gukuraho ubutegetsi bw’u Rwanda: Major wa FARDC