Somalia: Abasirikare 3 ba UAE n’uwa Bahrain biciwe mu kigo cy’imyitozo ya (…)

Minisiteri y’ingabo ya Leta Zunze Ubumwe z’Abarabu yatangaje ko ku wa Gatandatu, abasirikare batatu b’iki gihugu n’umusirikare wa Bahrein baguye mu gitero cyagabwe mu kigo cya gisirikare muri Somalia ubwo bari mu butumwa bwo gutoza ingabo za Somalia.

Minisiteri yanditse ku rubuga nkoranyambaga X, rwahoze ari Twitter, ko “abasirikare bagabweho igitero cy’iterabwoba bari mu nshingano zabo zo gutoza no gukarishya Ingabo za Somalia,”

Minisiteri yongeyeho ko abandi bantu babiri bakomerekeye muri icyo gitero, ariko nta yandi makuru arambuye yatanze nk’uko iyi nkuru dukesha Deutsche Welle ikomeza ivuga.

Igitero cyabereye ku kigo cya gisirikare cy’imyitozo cyo mu murwa mukuru, Mogadishu nk’uko amakuru yatangajwe kuri iki Cyumweru avuga.

Ayo makuru avuga ko umusirikare umwe mu batozwaga mu Ngabo za Somalia ari we warashe kuri bagenzi be imbere muri iki kigo.

Al-Shabab yigambye igitero

Iki gitero cyigambwe na al-Shabab, umutwe w’iterabwoba ukorana bya hafi na al-Qaeda kandi ukomeje kugaba ibitero simusiga kuri guverinoma nkuru ya Somalia ndetse n’abanyamahanga bayishyigikiye kuva mu 2006 hagamijwe kwishyiriraho ubutegetsi bugendera ku matwara akakaye ya kisilamu.