Perezida Félix Antoine Tshisekedi wa Repubulika Iharanira Demokarasi ya Congo yatangaje ko abacancuro barenga 1,000 ari bo yitabaje, kugira ngo bamufashe guhangana n’umutwe wa M23.

Tshisekedi yabitangarije mu kiganiro aheruka kugirana n’abanyamakuru Marc Perelman wa Televiziyo ya France 24 na mugenzi we wa RFI, Christophe Boisbouvier.

Umutwe wa M23 umaze igihe uvuga ko usibye kuba urwana n’Ingabo za Repubulika Iharanira Demokarasi ya Congo, mu Bo urwana na bo harimo n’abacancuro b’abanya-Burayi.

Tshisekedi yavuze ko abacancuro babarirwa mu 1,000 ari bo RDC yiyambaje, mu rwego rwo kongerera ingufu n’ubushobozi Ingabo za FARDC.

Yagize ati: "Twabazanye kugira ngo twongerere ingufu ingabo. Ni abahanga barimo ababaye mu mitwe idasanzwe y’ingabo n’abakomando, rero bafite inshingano zo kongerera ubushobozi ingabo za Leta mu bihe by’intambara aho urugamba rubera. Barwana ku ruhande rwacu birumvikana. Bagera ku 1000."

Tshisekedi yavuze ko bariya bacancuro baba bari ku rugamba ariko bari guhugura ingabo za Leta, batarwana.

Yifashishije urugero rw’umutoza mu mupira w’amaguru ati: "Bari ku rugamba baha amasomo abasirikare. Ese umutoza wa ruhago akina mu ikipe ye? Aba ari ku kibuga areba uko abakinnyi be bakina. Na bo barahari bigisha, ubundi bakareba uko ingabo zirwana."

Tshisekedi yavuze ibi mu gihe incuro nyinshi bariya basirikare b’abazungu bagiye bagaragara kenshi bafatanya na FARDC ku rugamba.

Amakuru avuga ko hari na bamwe muri bo M23 yaba yariciye ku rugamba.

Izindi Nkuru Bijyanye

Umunyamakuru wavuzwe mu rubanza rwa Bunyoni yashyize hanze amabanga ku rupfu rwa Nkurunziza

Salva Kiir yataramwe ku bwo kwita Samia Suluhu Perezida w’u Rwanda, Tshisekedi uwa Uganda

RDC: Urujijo ku rusaku rw’amasasu yumvikanye hafi y’Ikigo cya gisirikare