Umuyobozi w’itorero ADEPR, Rev. Pasiteri Ndayizeye Isaie, yavuze ku byabereye mu rusengero rwa Nyarugenge nyuma y’aho ashinjwe guha ikaze abamamaza abaryamana bahuje ibitsina bazwi nk’abatinganyi.

Ku mbuga nkoranyambaga hari gukwirakwira amakuru avuga ko Pasiteri Ndayizeye “yahaye ikaze abatinganyi” guhera kuri uyu wa 14 Nzeri 2023 hashingiwe kuri videwo y’Umunyamerikakazi Kake Cheys wagiriye uruzinduko mu Rwanda.

Ejo ni bwo Kake yagaragaye mu rusengero rwa ADEPR Nyarugenge, ahaberaga amahugurwa y’iyobokamana, mu gihe cyo kuramya Imana, yegera imbere hafi y’uruhimbi, arambura igitambaro yari afite cy’amabara y’uruvange, akizunguza mu kirere.

Pasiteri Ndayizeye agaragara muri iyi videwo yegera uyu Munyamerikakazi, aramwongorera [ibyo yamubwiye ntibiramenyekana], na we amufata ku mugongo. Hari abasobanuye ko yamubwiraga ko iki gitambaro ari ikibazo, na we amuhumuriza ko atongera kukizunguza.

Nyuma yo kubona ko ibyo yakoze byateje impaka, Kake ukiri mu Rwanda kuri uyu wa 14 Nzeri yifashe amashusho, asobanura ko nta kibi yari agambiriye. Aya ni yo BWIZA yahawe na Pasiteri Ndayizeye ubwo yamusabaga kugira icyo avuga ku makuru ari gukwirakwira ku mbuga nkoranyambaga.

Kake yumvikana agira ati: “Ndagira ngo nsabe imbabazi ku kintu cyagaragaye gisa naho kidakwiye, ku gitambaro cyagaragaye murusengero rwa ADEPR Nyarugenge aho twari turi uyu munsi. Aho nturuka igisobanuro cyacyo ni ikindi. Twebwe iwacu dukoresha ibitambaro bisanzwe turamya Imana.”

Uyu Munyamerikakazi uhamya ko yakiriye agakiza kuva afite imyaka 9 y’amavuko, yakomeje ati: “Ni ukuri nta cyo nari ngambiriye kandi mbisubiremo nta ntego mbi yindi mfite yo kwamamaza ubutinganyi ariko ndagira ngo mbabwire ko ncishijwe bugufi no kuba hano, nishimiye kuzagaruka nkongera nkababona tugafatanya namwe kuramya no guhimbaza Imana”.

Kake yasubiyemo ko icyo yamamaza ari Kirisitu aho kuba ubutinganyi. Ati: “Njyewe gahunda namamaza ni iya Yesu Kirisitu gusa. Nta yindi gahunda namamaza, yewe sinamamaza LGBTQ. Yesu ni we mwami n’umukiza wanjye. Icyo nifuza ni ukuzana urukundo rw’umwuka wera kuri mwebwe no kuri njye kuko ni cyo Yesu yadukoreye twese.”

Pasiteri Ndayizeye yasobanuye ko Kake atari umutinganyi kandi atamamaza ubutinganyi. Ati: "Ari na we si umutinganyi kandi ntabwo yamamaza ubutinganyi, rero mu cyo twabwira abantu ni uko dukomeza kuba mu murongo twahisemo nk’itorero kandi ushingiye ku ijambo ry’Imana kandi ikindi ni uko tunakomeza kuvuga ubutumwa bwiza bwa Yesu Kirisitu no gusenga."

Izindi Nkuru Bijyanye

Lutundula yabwiye akanama ka Loni ko kajugujugu ya RDF iherutse kugwa i Rumangabo

Niteguye kuba umunyagitugu n’inkoramaraso ku bw’icyubahiro cya RDC: Tshisekedi

Abasirikare barenga 10,000 ba Ukraine bayamanitse imbere y’Abarusiya