APR BBC irakoza imitwe y’intoki ku Gikombe cya shampiyona iheruka mu myaka 14

Ikipe ya APR BBC yaraye itsinze REG BBC amanota 80-75, biyongerera amahirwe yo kwegukana igikombe cya shampiyona iheruka mu myaka 14 ishize.

Amakipe yombi yari yahuriye mu mukino wa nyuma wa gatatu, nyuma y’uko ibiri yari yabanje iriya kipe y’Ingabo z’Igihugu yari yayitsinze yombi.

Uwa mbere wakinwe ku itariki ya 01 Nzeri yawutsinze ku manota 68-62, uwa kabiri iwutsinda bitayigoye ku manota 70-62.

Iyi kipe yiyubatse cyane muri uyu mwaka w’imikino yatangiye agace ka mbere k’umukino iri hejuru cyane, kuko yagatsinze biyoroheye ku manota 24-14 ya REG.

REG yagarutse mu gace ka kabiri k’umukino yariye karungu, kuko karangiye igatsinzemo amanota 30 kuri 17 yonyine ya APR.

Iyi kipe y’umutoza Cliff Awuor cyakora igice cya mbere cy’umukino cyarangiye ikiri imbere n’amanota 44-41 ya REG.

Agace ka gatatu k’umukino karanzwe no guhangana gukomeye hagati y’impande zombi, gusa karangira ikinyuranyo cyatandukanyaga amakipe yombi cyiyongereyeho inota rimwe.

APR BBC yasoje aka gace ikiri imbere n’amanota 64-60.

Mu mikino amakipe yombi yaherukaga guhuriramo REG BBC yakunze kugorwa cyane n’agace ka nyuma k’umukino.

Iyi kipe ni byo byongeye kuyibaho mu ijoro ryakeye, kuko muri aka gace APR yayitsinze amanota 16 kuri 15, bituma yegukana Game ya gatatu ku manota 80-75.

APR BBC kuri ubu irasabwa gutsinda umukino wa kane ikegukana Igikombe cya shampiyona iheruka muri 2009.