Abakozi b’Ibitaro bya Mugonero biherereye mu kagari ka Ngoma, mu murenge wa Gishyita , mu karere ka Karongi, bahawe ubumenyi ku bitera inkongi z’imiriro, uko bazirinda , ndetse n’uko bazizimya mu gihe zibaye.
Abahuguwe ku italiki ya 24 Werurwe ni abaganga b’ibitaro, ababikoramo isuku ndetse n’abarwaza bakaba bose barageraga kuri 60.
Bahuguwe na Inspector of Police (IP) Jean Baptiste Rutebuka, akaba ashinzwe imikoranire ya Polisi n’abaturage ndetse n’izindi nzego hagamijwe kurwanya no gukumira ibyaha muri aka karere.
IP Rutebuka yatangiye abasobanurira ko inkongi z’imiriro ari uruhurirane rw’ibintu bitatu by’ingenzi bigaragazwa nk’ikibatsi gifite ubushyuhe, ari byo: ikintu cyose gishobora gushya, cyaba igisukika cyangwa icyaka, ingufu, ndetse n’umwuka.
Yababwiye ko ziterwa ahanini no kwirara, kutita ku bintu bishobora kuzitera, impanuka, ndetse n’ ubumenyi buke kuri zo.
Ibindi yababwiye bishobora kuzitera harimo gukoresha ibikoresho by’amashanyarazi bitujuje ubuziranenge, ndetse no gukoresha abantu badafite ubumenyi mu gushyira amashanyarazi mu nyubako.
Yagize ati:" Uburangare runaka cyangwa ikosa rito mu mirimo ikoreshwa amashanyarazi birahagije kugira ngo byangize ibintu bitagira ingano cyangwa bihitane ndetse bikomeretse abantu. Ni yo mpamvu buri wese akwiye kwirinda no kurwanya ikintu cyose gishobora kuyitera."
IP Rutebuka yakomeje agira ati:"Ntimugomba gukumira inkongi z’imiriro muri ibi bitaro gusa, ahubwo mukwiye no gushyiraho ingamba zo kuzirwanya haba mu ngo zanyu ndetse n’ahandi."
IP Rutebuka yabagiriye inama yo kugura ibikoresho bizimya umuriro anabasobanurira uburyo utarabona ubushobozi bwo kubigura yakoresha umucanga, amazi, n’ibitaka byumutse mu kuzimya inkongi y’umuriro. Yababwiye ko ikihutirwa iyo umuntu abonye inkongi ibaye mu nzu ari uguhita ahagarika amashanyarazi no gusohora byihuse ibikoresho biyirimo ngo bitangirika.
Na none IP Rutebuka yabakanguriye kutabika ibikomoka kuri peterori mu nyubako, no kutajya kure y’ibikoresho biri kwaka nka buji, itara, itadowa n’ibindi, kuko na byo bishobora gutera inkongi z’imiriro.
Yashoje ikiganiro yagiranye n’abo bakozi ababwira kujya bahamagara nomero za terefone za Polisi y’u Rwanda zitabazwa iyo habaye inkongi y’umuriro arizo: 111, iyi ikaba itishyurwa, n’izindi zishyurwa zikurikira: 0788311120, 0788311224, 0788311657 na 0788311335 nk’uko iyi nkuru y’urubuga rwa polisi ikomeza ivuga .
Ushinzwe ubutegetsi mu bitaro bya Mugonero, Bwana Niyonzima Faustin yashimye Polisi y’u Rwanda muri aka karere kuri ubwo bumenyi yahaye abakozi b’ibitaro, aha akaba yaragize ati:"Ubu bumenyi buzatuma twirinda inkongi z’imiriro muri ibi bitaro ndetse no mu nyubako zacu, kandi buzanatuma tuzizimya mu buryo nyabwo mu gihe zibaye."
Kanda hano ujye ubona amakuru yihuse kandi kugihe kuri Facebook no kuri twitter
Bwiza.com
Tanga igitekerezo