Gen. Cirimwami ‘wafashaga’ Wazalendo agiye gusubizwa muri Kivu y’Amajyaruguru

Gen. Maj. Peter Cirimwami uvugwaho gufasha imitwe yitwaje intwaro ihuriye muri Wazalendo agiye gusubizwa ku buyobozi bw’ibikorwa bya gisirikare mu ntara ya Kivu y’Amajyaruguru muri Repubulika ya demukarasi ya Congo (RDC).

Cirimwami yahawe iyi nshingano n’Umugaba Mukuru w’ingabo za RDC, Lt Gen. Christian Tshiwewe, abitegetswe na Perezida Félix Tshisekedi. Ni ko amakuru aturuka muri RDC abivuga.

Uyu musirikare arasimbura kuri iyi nshingano Lt Gen. Constant Ndima wari unasanzwe ari Guverineri w’intara ya Kivu y’Amajyarugu, uyu akaba aherutse guhamagazwa n’urwego rw’iperereza i Kinshasa kugira ngo abazwe iby’ubwicanyi abasirikare bakoreye abasivili i Goma tariki ya 30 Kanama 2023.

Biravugwa ko Lt Gen. Ndima azagaruka muri Kivu y’Amajyaruguru vuba, akomeza inshingano imwe, ari yo ya Guverineri w’iyi ntara ku rwego rwa gisirikare nk’uko byari bisanzwe mbere y’itabwa muri yombi rya Lt Gen. Yav Philémon wari ushinzwe ibikorwa bya gisirikare.

Gen. Maj. Cirimwami yakuwe muri Kivu y’Amajyaruguru, ajyanwa mu ntara ya Ituri, ahashingwa ibikorwa bya gisirikare muri Nyakanga 2022. Icyo gihe yasimbuwe na Lt Gen. Yav.

Umuyobozi w’umutwe witwaje intwaro wa Nyatura CMC, Habyarimana Jean Claude, uzwi nka Jules Mulumba, aherutse gutangaza ko Gen. Cirimwami yafashaga imitwe ya Wazalendo [ayita igisirikare] mu gihe yari ihanganye n’umutwe witwaje intwaro wa M23, gusa ngo ubwo Yav yamusimburaga, bacitse intege.

Mulumba yagize ati: "Komanda mu gisirikare cya FARDC yarahinduwe, Général witwa Cirimwami baramwimura, ni we wari ufashe neza igisirikare, FARDC igakora neza. Bamaze kumwimura, bashyizeho uwitwa Yav, Yav aratwirukana. Bashatse no kuturasa turi kurwanira igihugu, baratwirukana dusubira inyuma."

Yakomeje ati: "Turi gutangira runo rugamba, hari aho M23 yagereje i Gitshanga, turarwana inkundura hafi amezi atatu, turi kubwira Leta ngo ‘Nyamara twashiriwe, tubuze kino’, ntabwo byigeze bikorwa kugeza ubwo Gitshanga yafashwe."

Mu gihe Leta ya RDC ivugwaho kutita kuri Wazalendo kandi ngo "bari kuyifasha kurwanya umwanzi" M23, Gen. Maj. Cirimwami ashobora gukoresha umuvuno we, akongera akayifata neza.