Umutwe witwaje intwaro wa M23 watangaje ko witeguye kwerekana abandi basirikare barimo ab’u Burundi n’aba Repubulika ya demukarasi ya Congo, RDC, wafatiye ku rugamba mu bihe bitandukanye.

Ibi byavuzwe na Perezida wa M23, Bertrand Bisimwa, mu kiganiro ubuyobozi bw’uyu mutwe bwagiranye n’abanyamakuru mu mujyi wa Bunagana, tariki ya 18 Ugushyingo 2023.

Mu gihe M23 ivuga ko yafashe mpiri abasirikare b’Abarundi benshi bari baragiye mu butumwa bw’amahoro bw’umuryango wa Afurika y’iburasirazuba, umunyamakuru wa BWIZA yabajije Bisimwa umubare wabo, asubiza ko urugamba rukomeje, abafatwa biyongera.

Bisimwa yagize ati: “Nk’uko mubizi, urugamba rurakomeje kandi dukomeje gufata abo ngabo b’u Burundi n’abandi. Igihe nikigera tuzabatumaho kugira ngo tubereke abo twafashe bose, nibiba ngombwa namwe mwiganirire na bo.”

Yakomeje ati: “Ni bwo muzamenya umubare wabo, muzamenya ibihugu bakomokamo, byose muzashaka muzabibona kandi ni isezerano mbahaye.”

Ku basirikare b’u Burundi, M23 iherutse kwerekana 3 yafashe mpiri. Bivugwa ko yiciye ku rugamba muri Kitshanga abandi barenga 15 barimo uwari ubayoboye, Major Ernest Gashirahamwe. Yerekanye kandi aba RDC, abarwanyi ba FDLR na Wazalendo.

Izindi Nkuru Bijyanye

Kwa Basabose mu Bubiligi bafite amabendera y’u Rwanda ya kera: Ubuhamya

Komanda w’ingabo za Uganda zirwanya ADF yinubiye imihanda yo muri RDC

Ingabo za RDC zongeye guta ‘intwaro nyinshi’ ku rugamba